Palín Positivo / Rutz’o’iil Pa’laq Ha’

Porque lo bueno de Palín ¡es más! / Ru’uum tz’oo’ kiwach k’ih qa’ taqee’ wilkee’ pan la tinimit Pa’laq Ha’

  • noviembre 2010
    L M X J V S D
    « Oct   Dic »
    1234567
    891011121314
    15161718192021
    22232425262728
    2930  
  • Colaboradores

    Este blog cuenta con la colaboración de: Carlos Isabel Gómez - Magdalena Pérez - Vinicio Lobo - José Alberto Ordóñez - Arturo Luciano Benito - Juan Alberto Tubac Par. ¡Tú también puedes unirte!

Winaqiib’ xkib’an q’orik, xi’kahna koon kiroo nkito’om kiib’

Posted by palinpositivo en noviembre 1, 2010

Por: Jaime Rodríguez

Traducción al Poqomam: Arturo Luciano Benito

Chiki’b’antaja korik la kamanik taqee’ chije’ chikito’ ar kiib’ chi kixelek la puuq winaqiib’ wilkee’ pan la tinimit reh Pa’laq Ha’, Tz’ii’ Yuu’, re’ rukoor xi’kahna koon la winaqiib’ xkimal kiib’ pan la q’iij kajab’ Kej reh la Maya’ Lok’b’al Q’iij. La q’orik loo’, xb’antaja pan ruwii’b’al Qawinaqel K’uhtb’al, wila pan la puuq winaqiib’ reh San Antonio, tinimit Pa’laq Ha’, Tz’ii’ Yuuq’.

Chi paam la q’orik loo’, xi’wi k’amal b’ee qawinaqel taqee’ chije’ k’amal b’ee q’aq taqee’ keh ch’ahqon puuq winaqiib’ wilkee’ pan la tinimit reh Pa’laq Ha’. Ja’ar xi’wi’, ch’ahqon winaqiib’ naak ar kikamana chi kiij la qa’ taqee’, naak ru’aawtaja chiki’korpaia kiwach reh je’ are’ chiwi’ junaj korik kik’achariik la winaqiib’ kipaat pan la tinimit Pa’laq Ha’. Reh xwi’ rukoor chije’ reh xwi’ pa rulok’ la q’orik loo’, xkik’am b’ee ka’ab’ imasaq xi’chala reh la tinimit Armiita: Lic. Daniel Tucux ruu’ Lic. Fidel Us, ja’ar xwi’ kuu’ la ixoq ah Pa’laq Ha’, Licda. Magdalena Pérez.  La q’orik  xb’antaja pan la q’iij loo’, re’ ja’ar junaj kamanik xkikamanb’ee la puuq Ixoqiib’ Ixq’aniil Pa’laq Ha.

Chikiye’ kik’ux reh junaj korik kamanik, chib’antaja k’ih q’orik chije’ ja’ar chiwi’ junaj kux to’onik chi kixelek la puuq winaqiib’ wilkee’ pan la tinimit loo’, re’ la qa’ taqee’ kiroo naq nkib’anta reh je’ are’ la tinimit Pa’laq Ha’ nruwaq ta wach, xuq’or la imaas Lic. Tucux.

La imaas Lic. Us, xuq’or ka’ab’ oxib’ qa’ taqee’ ki’to’wa naq la winaqiib’ reh junaj tinimit nkajaam nkik’utum kiwach, la qa’ taqee’ loo’ re’ je’ tii la kiq’orb’al chije’ kib’ih. Ja’ar xutz’irsaa, wilkee’ k’ih qa’ taqee’ ki’b’antaja re’ aka chi kixelek junaj puuq winaqiib’ reh junaj tinimit. La qa’ taqee’ loo’, re’ ki’kamaj reh nkik’ut kiwach la tinimiit taqee’ ru’uum re’ la qa’ taqee’ loo’, at’alamaj kiwach je’ la qa’ taqee’ nkiye’ ruk’achariik junaj tinimit pan kaxlan q’orb’al elmentos de la cultura de un pueblo.

Xq’orara ar, k’ih qa’ taqee’ ki’b’antaja chi kipaam la tinimit taqee’, man nqak’axamaj ta kikoor ru’uum re’ xq’orara ar, wilkee’ pach man kiroo ta naq qahq’orwa qa chi riij wila qa’keh chije’ ja’ar man kiroo ta naq qahq’orwa ar qa chi kiij la winaqiib’ reh junaj tinimit. Loo’ ru’uum je’ xq’orara tii, wilkee’ k’ih qa’ taqee’ ki’b’antaja man nqak’axamaj ta kikoor, xa re’ la qa’keh taqee’ ki’b’anwa, kat’aliim la no’ooj wilkee’ chi kiij la qa’ taqee’ loo’.

Re’ cha ar reh xku’xa pa naa’ la q’orik, la ixoq Licda. Magdalena Pérez xuq’or koon, kiroo naq chiki’b’antaja pan kilok’ la kamanik taqee’ chije’ kiroo naq ja’ar chiwi’  junaj kux to’onik chi kixelek la qawinaqel chije’ q’aq ru’uum re’ aka je’ are’, nruwi’ junaj korik kik’achariik la qawinaqel chije’ q’aq kipaat pan la tinimit reh Pa’laq Ha’.

Lee la nota en Español aquí

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

 
A %d blogueros les gusta esto: